Namatay sulod sa tambalanan human sa pipila ka oras nga gitabang sa mga doktor ang usa ka babaye nga menor de edad ug tinun-an sa 2nd year high school human nalatayan sa ligid sa dumptuck niadtong Domingo sa sitio Looc sa barangay Poblacion Alegria pasado alas 11 sa buntag.
Segun sa report nga gipadangat sa Cebu Provincial Police Office nahiagom og bali sa duha niya ka tiil ug uban pang parte sa kalawasan si Jennifer Baisac Ortiz, 14 anyos, residente sa naasoy'ng dapit nga maoy hinungdan nakabsan kini sa kinabuhi pasado alas 5 sa hapon sa susamang adlaw sa Vicente Sotto Memorial Medical Center.
Usa ka cargo truck nagtangag sa plaka GDB 711 ang nakaligis sa biktima nga gimaneho sa negosyanteng si Henry Sia, 46, nga taga Ronda.
Matud sa taho sa kapolisan nga padulong sa habagatan si Sia apan pag-abot sa nahitaboan wala makabantay ang naulahi nga nikalit paglabang sa pikas dalan ang biktima hinungdan nga siya nadasmagan ug nalatayan sa ligid.
Ang biktima daling gidala sa nahisgutang tambalanan apan pipila ka oras namatay.
Hinuon ang drayber sa cargo truck boluntaryong mitahan sa buhatan sa kapolisan samtang gihikay pa ang tukmang kaso nga ipasaka batok sa maong drayber.