Lolo, dos anyos nangalumos sa beach

Nalumos patay ang usa ka 56 anyos nga lolo ingon man ang usa ka dos anyos nga batang lalaki samtang kini nag-picnic  ug nangaligo sa dagat sa managlahing lugar kauban ang ilang tagsa tagsa ka pamilya niadtong Domingo.

Ang unang panghitabo nitumaw sa Blue Beach Resort sa barangay Pooc siyudad sa Talisay diin namatay gyud ang usa ka 56 anyos nga lolo nga si Emeberto Alcibar,   kasamtangang nagpuyo sa Pardo dinhi sa dakbayan sa Sugbo apan lumad nga taga Malabuyoc, Cebu.

Nasayran gikan ni SPO3 Cleofas Bunjoc sa Talisay City Police station dihang nahinabi sa Banat News nag-picnic sa dagat ang biktima kauban ang iyang pamilya. Nangabang ang biktima og sakayan nga ilahang gisakyan sa ilang pagpangaligo kauban ang iyang tulo ka mga apo nga nagpangidaron og 12, 9 ug 7 anyos.

Matud ni SPO3 Bunjoc paghiabot niini sa lawom nga dapit kalit lang nalunod ang gisakyan niini sa mga alas 5:00 sa hapon niadtong Domingo nga maoy hinungdan sa pagkalumos sa biktima apan naluwas hinoon ang tulo ka mga bata. "Naningkamot siguro ni nga maluwas ang iyang mga apo mao siguroy hinungdan nga siya na hinoon ang namatay,” dugang asoy ni SPO3 Bunjoc.

Gisuwayan unta pagdala sa Talisay District Hospital ang biktima apan gideklarar kini sa mga doktor nga dead on arrical (DOA).

Samtang sa laing panghitabo usa ka dos anyos nga batang lalaki ang nalumos patay usab samtang gipasagdan nga naligo sa dagat didto sa barangay Abucayan, Balamban Cebu alas 10:00 sa buntag sa mao gihapong adlaw.

Nasayran gikan ni PO2 Cesar Climaco sa Balamban Police Station nangaligo sa dagat ang biktima kauban ang iyang mga ginikanan ug igsoon.

Apan samtang nagkalingaw sa pagpangaligo ang mga ginikanan niini ug igsoon napasagdan ang biktima samtang naligo sa lapyahan sa dagat ug wala dayun kini mabantayi nga nalumos.

Matud ni PO2 Climaco nga mga alas 10:00 pasado na sa buntag namatikdan sa ginikanan niini nga nawala ang ilang kamanghurang anak ug dihang ilang gipangita nakit-an nalang nila kini nga nalunod na ilawom sa dagat  nga taga hawak ang  gilawmon.

Gisuwayan unta nila pagdala sa Balamban District Hospital apan gideklarar kini sa mga doktor nga DOA.