Mipatay sa brgy. Kap sikop

Usa sa mga gitumbok nga mitulis ug mipatay sa barangay kapitan sa usa ka lungsod sa Northern Cebu ug gikunsiderar nga usa sa most wanted sa Sogod ang nadakpan human sa pagtago-tago og kapin usa ka tuig sa Ormoc City human matultuli sa mga sakop sa intelligence operatives sa Sogod police station ug Ormoc City police station.

Ang nadakpan mao si Abraham Brigoli Jr., 27, kanhi residente sa barangay Dakit, Sogod, ug  didto na magtago-tago sa barangay Domonar, Ormoc City kinsa dunay duha ka warrant of arrests gikan ni Judge Edito Enemecio sa Regional Trial Court Branch 27 sa Danao City.

Ang grupo nila ni SPO3 Joemiller Baticuang, SPO2 Renaldo Branzuela and SPO2 Melianito Baladjay miadto sa Ormoc City human sila makadawat og impormasyon kabahin sa nahimutangan ni Brigoli.

Kauban ni Brigoli nga gipangita mao sila si Sonny Catapan, Gino Preglo, Ricky Preglo ug Mamerto Catapan ug Joseph Montebon, kinsa padayon pang gipangita sa kapolisan.

Ang grupo maoy gitumbok nga mitulis ug mipatay kang Buliwang barangay Captain Galicano Montebon sa lungsod sa Tuburan niadtong milabay'ng tuig ug gitumbok usab silang may kalambigitan sa uban pang insidente sa pagpanulis sa nahisgutang parte sa lalawigan.

Si Brigoli dunay kasong  robbery with homicide kansang warrant of arrest pinetsahan og Pebrero 26, 2008 ug attempted murder nga pinetsahan og Marso 9, 2007.

Walay   girekomendar nga piyansa ang hukom sa unang kaso niini samtang P120,000 nga piyansa usab ang sa laing kaso.

Si Brigoli kusganon hinuong mihimakak sa pasangil batok kaniya ug mihimakak nga nagkakuyog sila paghimo og krimen uban sa laing gitumbok nga mga suspek.

Ang grupo ni Brigoli maoy suspek pagpusil sa usa ka sakop sa Barangay Intelligence Network (BIN) ug nakigpinusilay usab sa mga polis sa Daanbantayan niadtong milabay'ng tuig.

Giila ang BIN member nga mao si Rogelio Emelyada, 38,   taga barangay Calape kinsa naigo sa walang sampot human gipusil sa grupo ni Preglo samtang iyang gikuyogan ang mga polis nga sila si Edwin Dignos ug Keith Castro sa Daanbantayan pagtubag sa alarma sa pagpabuto diha sa usa ka diskohan.

Matud pang PO1 Columbus Noynay si Emelyada maoy unang misulod aron susihon kinsay nipabuto apan kalit kining gipusil sa grupo ug dihang mitabang ang duha ka kauban niining polis hasta kini ilang gipabuthan ug nangikyas.