Patay diha-diha gilayon ang usa ka kargador human gitangkugo sa pagpusil kagahapon sa alas 2:30 sa kaadlawon diha sa Calderon St., dili layo sa Unit 1-2 Carbon Market barangay Ermita ning dakbayan.
Ang biktima giila sa kapulisan nga si Rafael Martos, alias Bingbing, 36, minyo, taga Quezon Blvd. barangay Sto. Niño samtang ang suspetsado giila nga si Wendel Dominguez hingkod ang panuigon, standby ug residente sa Bato Carbon, barangay Ermita.
Sa imbestigasyon nila ni SPO1 Rogelio Nedamo ug mga kaubanan sa Homicide Section sa Cebu City Police Office ang biktima walay nay kinabuhi nga nagbuy-od daplin sa dalan nga adunay samad pinusilan sa iyang luyong bahin sa ulo.
Dugang nakuhang impormasyon sa kapulisan nga ang biktima naglakaw kuyog sa laing duha ka amigo kagahapon sa kaadlawon paingon sa sudlonong bahin sa nahisgutang lugar.
Ang suspetsadong si Dominguez kalit lang nibutho sa ilang likod ug sa walay daghang pangutana nipusil sa biktima maka-usa ka higayon sa likod sa ulo niini nga maoy hinungdan sa hinahali niining kamatayon.
Human sa pagpamusil ang supetsado daling nisibat palayo sa nahisgutang lugar ug wa na maabti pa sa mga nirespondeng police gikan sa Carbon Police Station ug mga barangay tanod sa nahisgutang lugar.
Sa pagsusi sa kapulisan sa crime scene, nakuha ang usa ka kabhang sa bala sa .45 kalibreng pistola, gisusi pa usab kung unsay motibo sa pagpatay kaniya.