Varsity player gitulis--patay

Usa ka varsity player sa University of the Visayas Green Lancers ang gitulis ug gipatay sa tulo ka wala mailhing tulisan nga nagsakay og motorsiklo niadtong Biyernes sa gabii diha sa barangay San Vicente sa lungsod sa Liloan.

Giila ni SPO1 Dennis Malinao imbestigador sa Liloan Police Station nga maoy naggunit sa maong kaso ang biktima mao si Lucky Mantohac Pitogo, 19, residente sa maong barangay. Si Pitogo sakop sa UV Green Lancers ug second year sa kolehiyo.

Samtang gipangita pa karon sa kapolisan ang tulo ka wala mailhing mga tulisan nga luwan sa motorsiklong kolor pula nga walay plaka kinsa daling miikyas padulong sa barangay Lamac sa lungsod sa Consolacion.

Si Malinao sa pakighinabi sa Banat News nitug-an nga nagkuyog si Pitogo ug 16-anyos nga ig-agaw niini nag-biking niadtong tungura.

Gikatahong samtang sila nag-bisekleta nalabyan sa mga tulisan ang duha ug mihunong sa unahan. Sumala pa sa 16-anyos nga nanganaog ang duha ka backriders.

Nabiyaan og dyutay pipila ka metros sa 16-anyos ang biktima tungod kay nag-text pa kini samtang nagbisekleta ug dihang iya ngan nalabyan ang duha ka lalaki kalit nilang gibabagan ang nagsunod nga si Pitogo.

Gikatahong gitiunan dayon og armas si Pitogo ug giilog ang cellphone niini apan giingong dunay nahitabong panaglayog ug nipaka dayon ang usa ka buto sa armas.

Matud pang Malinao nahagba sa aspaltadong dalan si Pitogo samtang nagdali og balik sa nagpaabot nga motorsiklo ang duha ka mamumuno ug nangikyas palayo apan wala nila madala ang cellphone nga dunay camera nga gibana-banang mokantidad og P10,000.

Ang 16-anyos daling nangayo og tabang sa mga tawo ug sa ilang mga silingan ug ang iyaan sa biktima mao nay nidala kaniya sa Chung Hua Hospital apan gideklarar kining dead on arrival.

“Gilayog man ni siya, unya kay dako man siya nisukol mao tong gipusil,” sumala pang Malinao. Si Pitogo may gitas-ong 6’3 ang height.

Sumala pa usab sa coach sa UV Green Lancers nga si Elmer Cabahug sa pakighinabi sa Banat News bag-uhay pang nakahuman og panihapon niadtong tungura si Pitogo ug nigawas sakay sa bisekleta.

Ang ig-agaw niini mitug-an nga gibaharan usab kining pusilon dihang nahagba na si Pitogo kung kini moduol.

Si Pitogo ni-praktis pa niadtong milabay'ng adlaw diin kini namatikdang mi-wadwad ug namuntos sa duwa. Gikatahong nangomedya pa kini nga iyang pabilibon si Cabahug apan wala damha nga mao na kadto ang katapusan niining praktis.

“He was a big loss top our campaign,”asoy pang Cabahug nga nagpasabot sa ilang kampanya sa kampeyonato sa CESAFI.

Matud pang Cabahug dunay financial assistance nga gisaad ang UV sa pamilya ni Pitogo pinaagi sa team manager nga si Gerard Anthony “Didi” Gullas.

Ang patay'ng lawas ni Pitogo gidala sa Saint Francis Chapel duol sa Metropolitan Cathedral sa dakbayan sa Sugbu.