Patay ang usa ka pasahero sa habal habal human mahulog sa pangpang sa trancentral highway lungsod sa Balamban samtang nagtuman kini sa sugo sa lawas kagahapon sa alas 7:00 sa buntag.
Ang namatay giila sa kapulisan nga usa ka Pedring Engreso, 29, sa sitio Buli, barangay Cansomoroy sakop sa nahisgutang lungsod.
Matod ni PO3 Hanibal Larrida sa Balamban Police Station dihang nahinabi sa Banat News usa ka Germano Pacaña, habal habal drayber ang nipahibalo sa ilang buhatan kabahin sa tawo nga nahulog sa pangpang sa trancentral highway.
Gitug-an ni Pacaña sa kapulisan nga si Engreso gikan sa dakbayan sa Sugbu ug nagpahatod sa barangay Cansomoroy.
Apan paghiabot nila sa trancentral highway nihangyo kini nga mohunong tungod sa sugo sa lawas.
Gitug-an ni Pacaña nga samtang nagpaabot siya nakadungog siya og tingog sa agolo sa tawo ug dihang iyang gisusi ang lugar nga gipuntahan sa iyang pasahero wala na niya kini igkita.
Matud ni PO3 Larrida tungod sa pagtuo nga mao kadto ang iyang pasahero dali siyang nisumbong sa kapulisan ug sa gihimong pakisusi nakunpirmar nga si Engreso gyud ang nahulog sa 70 ka tiil nga bung-aw.
Alas 10:00 pasado na sa buntag nakuha ang patay'ng lawas sa biktima nga naputos na sa mga pangos ug samad samad ang kalawasan.