"Ihi" alternatibong abuno

Nanawagan karon si Cebu City Agriculturist Julito Baclayon ngadto sa mga mag-uuma partikular na sa siyudad nga gamiton ang ihi sa tawo isip crop fertilizer aron ihulip sa padayong nagkamahal nga abuno sa pananom.

Ang city agriculturist nidason sa pagtuon sa Department of Science and Technology (DOST) nga ang ihi sa tawo abunda sa nitrogen nga gikinahanglan sa mga tanom.

Gani niingon si Baclayon nga dili lang nitrogen ang anaa sa ihi lakip na usab sa ubang elemento nga gikinahanglan sa crop agriculture.

“Actually ihi is not only rich in nitrogen, it is also rich with other strange element which are needed by plants,” sumala sa city agriculturist.

Nagkanayon si Baclayon nga dali ra nga makaresponde ang mga tanom ilabi na sa mga utanon kung ihi sa tawo maoy gamiton nga abuno niini.

Gani ang malambuong kanasuran giingong niila usab sa ihi sa tawo nga maoy labing epektibo nga abuno sa food crop agriculture.

Ang DOST nanawagan na sa mga mag-uuma nga suwayan ang paggamit sa ihi sa tawo nga abuno aron mapamatud-an ang ka-epektibo niini.