P2M danyos sa Oslob

Sobra sa  P2  milyones  ang kinatibuk-ang danyos sa pagkasunog sa kombento ug karaang simbahan sa Immaculate Conception Parish sa lungsod sa Oslob niadtong Miyerkules sa kaadlawon.

Hinuon giklaro  sa fire marshal sa Oslob SFO2 Jaime Suycano dihang nahinabi sa Banat News nga inisyal pa nila kining banabana sa estruktura sa nasunog nga simbahan ug kombento  ug wala pay labot niini ang naapil pagkasunog nga mga antik nga santos, altar ug mga karaang lingkoranan.

Matud ni SFO2 Suycano gipaabot pa nila nga mohatag og kumpletong listahan sa mga na-apil pagkasunog nga mga santos ang kura paroko nga si Fr. Valentino Gemelo ingon man sa tukmang kantidad niini.

Matud ni SFO2 Suycano ang report gikan sa simbahan maoy ilang basehan pagbanabana sa opisyal nga danyos sa nahitabong sunog.

Nagkanayon si SFO2 Suycano nga posibleng mosaka pa ang maong danyos tungod kay mga karaan ang dapat nga kahoy sa maong simbahan, ingon man ang altar niini ug ang mga lingkoranan.

Hinuon nakapagawas na og report si SFO2 Suycano sa hinungdan sa maong sunog nga didto magsukad sa kwarto sa pari sa kombento  ug electrical short circuit ang hinungdan niini subay usab sa pag-umangkon sa pari nga si Ferryland Gemelo nga gisukit-sukit sa kabomberohan.

Nunot niini,  gihimakak ni SFO2 Suycano nga nalangay sila og responde  tungod kay matod niya bisan og guba ang duha nila ka fire truck  nakaabot sila sa fire scene wala pay 20 minutos human madawat ang alarma.

Apan gitug-an niya nga bugtong nasugatan nila nga problema mao ang pagkaguba sa  clutch sa maong mga firetruck tungod kay maglisud naman kini paghakot og tubig  sa dihang nahurot og pasirit sa kalayo.