Lorega brgy hall nasakpan nag-illegal tapping sa Veco

Giputlan og linya sa kuryente ang barangay hall sa Lorega-San Miguel kagahapong adlawa human masuta nga kini giingong ilegal nga mikutay og linya ngadto sa Veco lines.

Nahibaw-an nga naglisod ang barangay pag-aplay sa Veco pagpakutay og linya sa kuryente tungod kay giingong walay building permit ang barangay hall gikan sa Office of Building Officials.

Apan matud ni Mayor Tomas Osmeña nga dili kini rason nga mangawat og kuryente ang barangay aron lang makabaton sa sugang dagitabnon.

“They can apply and arrange for it but it is not an excuse for stealing electricity,” nagkanayon ang mayor dihang gikuhaan og reaksyon sa mga tigbalita.

Ang barangay kapitan sa Lorega-San Miguel nga si Lorenzo Monsanto dili maayo og relasyon ni Osmeña.

Gani giingong mahimo nga makakutay ang barangay hall og linya sa kuryente sa dakbayan, apan dili mosugot niini ang mayor.

Si Monsanto sa iyang bahin dihang gihinabi sa DyAB kagahapon nitug-an nga dihang nilingkod siya sa pagka-kapitan wala siya masayod nga wala kini kaugalingong metrohan ug gani wala gyud sila'y kuryente ug gipanglarot na ang mga linya niini.

Tungod niini iyang gihangyo ang presidente sa kapilya tupad sa BH nga sila temporaryong patapton sa ilang kuryente samtang iyang gihikay ang permit sa VECO apan nagkaproblema na usab sanglit giingong wala say building permit gikan sa OBO nga usa sa gipangayo sa VECO nga rekisitos aron matauran og kuryente.

Ang konsehal sa Lorega-San Miguel nga si Fritz Herrera maoy gitudlo ni Osmeña isip deputy mayor sa dakbayan ug karon maoy nakaingon nga nabahin na ang konseho sa maong barangay.

Si Ethel Natera ang public information officer sa VECO nitug-an sa mga tigbalita nga hangtud di sila makakumpleto sa rekisitos di gyud sila mahatagan og linya ug mabayran usab ang mga kinahanglang bayrunon.