Dako ang kahigayunang suportahan sa mga sakop sa Vice Mayors League Cebu Province (VMLCP) chapter si Cebu City Vice Mayor Michael Rama atol sa piniliay pagka Presidente sa Vice Mayor League of the Philippines (VMLP).
Kini ang giluwatang pamahayag ni Balamban Vice Mayor ug VMLCP Presidente Ace Binghay sa pakighinabi sa Banat News nunot sa pagsibog ni Mandaue City Vice Mayor Atty. Carlo Pontico Fortuna pagka Presidente sa VMLP.
Matod pa ni Binghay nga sayang kaayo ang pagsibog ni Fortuna gumikan kay angayan usab siya sa maong katungdanan.
Hinoon gisabot ni Binghay ang mga rason ni Fortuna sa iyang pagsibog ug kini gumikan sa kahimtang sa iyang amahan nga nagmasakiton.
Mipadayag si Binghay nga wala silay supak sa tinguha usab ni Cebu City Vice Mayor Mike Rama sa maong posisyon gumikan kay ligdong usab nga pagkatawo si Rama.
Matod pa ni Binghay nga usa sa ilang gihisgutan atol sa ilang panagtigum sa VMLCP kagahapon sa session hall sa Talisay City Hall diin posibleng magkahiusa ang ilang grupo sa pagsuporta ngadto ni Rama sa umaabot nga piniliay sa pagka Presidente sa VMLP.
Bisan pa sa kapildihan ni Rama sa milabay'ng duha ka piniliay sa VMLP karon posibleng ilang doblehon ang paningkamot sa pagpangam-panya aron mapadaog ang Sugbuanong kandidato.