SRP-M'baling overpass tukoron

Mokabat sa P50 milyones nga overpass ang pagatukoron ni Cebu City South District Congressman Antonio Cuenco diha sa Barangay Mambaling nga motadlas sa South Road Property (SRP).

Kini maoy gipahibalo sa kongresista dihang gikahinabi sa Banat News nga ang project study niini gihimo ni Engr. Necomides Leonor Jr. sa DPWH Cebu City District.

Matud pa sa kongresista nga ang maong proyekto iyang ipatuman karong tuiga ug tiwason usab sa dili pa mahuman ang iyang termino.

Gipasabot niini nga nahan-ay na ang P50 milyones nga pundo alang sa dul-an duha ka kilometro nga overpass ug iya na lang gipaabot mao ang project study nga iduso ni Leonor sa iyang buhatan.

Gipadayag pa niini nga kining maong proyekto maoy iyang gipanglantawan nga maoy makahatag og solusyon sa problema sa dagan sa trapiko diha sa Natalio Bacalso Ave. ug mga silinganang dapit sa Mambaling.

Matud pa niini nga ang kapin sa P20 milyones nga 4, lane road nga adunay gitas-on nga lima ka kilometro sa Barangay Bonbon ug Sinsin usa na sa nagpadayon karon nga gitrabaho.

Gawas pa nagpadayon usab ang iyang pagtukod sa mga taytayan nga kaagian og dagkong sakyanan nga nagkonektar sa Barangay Buot-Taop ug Bonbon.