Malamposon ug bongga ang pagsaulog sa ika-63rd nga kasumaran sa “Takas sa Talisay- Kagawasan sa Sugbo o “landing” diin mikabat sa P400 mil ang gigahin nga budget sa maong selebrasyon matud ni Konsehal Shirley Belleza, tsirman sa Tourism Heritage Historical Affair.
Si Belleza sa pakighinabi niini sa mga tigbalita kagahapon mibutyag nga P400 mil tanan ang nagasto sa pagpahigayon sa kalihokan sa landing.
Ang P200 mil sa maong salapi ang gikan sa panudlanan sa dakbayan ug P200 mil usab ang gikan sa probinsiya sa Sugbo.
Sa wala pa ipahigayon ang re-enactment gisugdan kini sa Santos nga Misa diha sa Santa Teresa de Avila sa barangay Poblacion mga alas 5:00 sa buntag dayon gisunod ang parada nga gilangkuban sa mga sakop sa Central Command Philippine Army, mga tinun-an sa Talisay City College ug mga national high school sa dakbayan, opisyal sa mga barangay ug mga tanod ug grupo sa mga kababayen-an.
Ang giatangan kagahapon mao ang re-enactment nga gipahigayon sa mga sakop sa Philippine Navy.
Usa sa mga sakop sa Marines nga si Corporal Reno Cabanlit kinsa miapil sa gipahigayong re-enactment sa pagtakas nila sa dagat ang nasamdan sa walang aping diin gituohan nga naigo kini sa pinisik sa pagbuto sa mga eksplosibo nga gibutang diha sa baybayon.
Ang mga sakop sa Philippine Army Special Command nga gikan sa Fort Magsaysay, Nueva Ecija ang mipahigayon og sky diving.
Walo ka mga sky divers ang milayat gikan sa chopper kinsa ang lima kanila ang mitugpa ngadto sa Talisay City Central School ug ang tulo diha mitugpa sa baybayon sa Poblacion nga si Master Sergeant Sensi de Dios, Master Sergeant Carmelito Fernandez ug Staff Sergeant Joe Franco Quiñoneba ang diriyot madisgrasya tungod kay diha kini mitugpa sa dike sa baybayon paglikay sa mga tawo ug mga bata nga mitapok.
Si Kongresista Eduardo Gullas, Department of Interior and Local Government Undersecretary Joselito Ruiz ug Mayor Socrates Fernandez ang miisa sa bandila sa Pilipinas, ug sila usab si Capt. Tekeshi Isihida ug Mario Nakayama ang miisa sa bandila sa Hapon ug Bill Sena ug Maurice J. St. Hilaire ang miisa sa bandila sa Amerika.
Si Ruiz ug Commodore Roberto Estokio sa Naval Forces central ang mipahigayon sa paghalad sa koronang buwak ngadto sa land mark.
Mitambong usab sa kalihokan kagahapon si Bokal Juan Bolo ug Julian Daan, Provincial Regional Director (PRO)-7 Ronald Roderos ug Cebu Provincial Police Office Director Carmelo Valmoria ug Lieutenant General Victor Ibrado, Commanding General sa Central Command.
Mga beterano nga sila si Colonel Leonardo Abalo, Colonel Manuel "Maning" Segura ug Leutenant Angelo Alo mitambong usab.