Simbahan sa Oslob 'ugdaw

Nahurot og kaugdaw ang karaang simbahan sa Immaculate Conception Parish apil na ang kombento niini ug ang mga antik nga imahen sa santos didto sa lungsod sa Oslob Cebu sa dakong sunog nga nahitabo kagahapon sa alas 2:30 sa kaadlawon.

Gibutyag sa hepe sa Oslob Police Station, SPO4 Isagani Tinapay dihang nahinabi sa Banat News bugtong ang kampanaryo nga hinimo sa bato ang wala maapil og kasunog.

Nadawat sa kabomberohan sa Oslob ang alarma sa sunog alas 2:30 sa kaadlawon ug pagka alas 4 sa kaadlawon una pa nakontrolar ang kayo.

Hinuon naatol nga wala sa iyang kombento ang kura paruko sa Oslob nga si Rev. Fr. Valentino Gemelo tungod kay dinhi kini sa dakbayan sa Sugbo alang sa recollection ug ang pag-umangkon niini nga sacristan nga si Ferryland Gemelo maoy nahabilin.

Matud ni SPO4 Tinapay gibutyag sa pag-umangkon sa pari nga didto magsugod sa kwarto ni Fr. Gemelo ang kalayo.

Sa iyang pagmata kagahapon sa kaadlawon nakita na niya ang kalayo nga gisundan dayon kini sa dakong kayo.

Apil sa nasunog ang mga antik nga imahen sa santos samtang dunay ubang mga santos ilabi na ang patron niini nga Immaculate Conception ang nasalbar ug kasamtangang gipahiluna sa session hall sa munisipyo sa Oslob. "Wala maapil kay matud pa lagi sa nakasaksi pagkahugno gyud sa atop natabunan ang santos maong wala ma-apil,” dugang asoy ni SPO4 Tinapay.

Ang maong sunog gipaubos sa general alarm diin apil sa miresponde ang mga kabomberohan sa mga kasikbit nga lungsod sama sa Santander, Argao, Dalaguete ug Sibonga.

Sa paghimo ning balita padayon pang gisusi ang hinungdan sa sunog ingon man nagpaabot pa usab kini nga mopauli ang pari aron makuhaan og kinatibuk-ang detalye kabahin sa mga antik nga santos nga nasunog aron mabanabana ang kinatibuk-ang danyos niini.