Sundalo ug polis nag-ilog sa chicks

Nagkaaway ug nag-ilogay sa armas ang usa ka polis nga nadestino sa Tuburan Police Station batok sa usa ka sakop sa 78th Infantry Batallion tungod lang sa babaye nga ilang giilogan atol sa gipahigayong disco sa kapistahan sa barangay Dos Poblacion, Tuburan, Cebu niadtong Martes sa alas 2 sa kaadlawon.

Si PO1 Ariel Montebon, molupyo sa nahisgutang lugar ug sakop sa Tuburan Police nagka-engkwentro tali ni PFC Jonibert Clarito, sakop sa 78th IB nga nagbase sa Tunlop, Colonia, Tuburan.

Matud ni PO3 Raul Jamero sa Tuburan Police Station mitambong og disco sa ilang barangay si PO1 Montebon nga off duty niadtong tungora ug nakigparis sa sayaw sa usa ka Karen Balbuena.

Apan nagselos si PFC Clarito hinungdan nga giduol niini si PO1 Montebon nga nagsayaw kauban ni Karen taliwala sa diskohan niadtong higayuna ug gitionan sa armas ug gilabnot ang buhok sa kaparis niining babaye.

Apan nabantayan ni PO1 Montebon ang armas nga kalibre .45 ni PFC Clarito nga gition sa iyang hawak ug dali niya kining natapi nga miresulta sa ilang paglinayogay.

Samtang gibutyag ni PO1 Montebon sa dihang nahinabi sa Banat News nga sa tanto nilang linayogay ni PFC Clarito nahunong usab ang disco tungod kay nag-iyahay og panagan pahilayo sa diskohan ang mga tawo.

Matud ni PO1 Montebon nailog gyud niya ang armas ni PFC Clarito ug nidagan kini pahilayo sa diskohan ug gi-turnover niya sa ilang buhatan sa kapolisan.

Gidugang ni PO1 Montebon nga nakabati siya og mga tabi tabi nga nagselos si PFC Clarito tungod kay ang babaye nga iyang gikaparis og sayaw kanhi niya girlfriend ug nakigbulag na. Apan matud pa dili kini makadawat hinungdan nga nagselos dihang nakita niini nga nagparis sila og sayaw atol sa maong disco.

Si Maj. Lao Lucas, civic-military operations officer sa 78th IB, iasoy sa Banat News nga adunay imbestigasyon nga gihimo alang sa maong insidente.

Si 2Lt. Geomar Pipit, ang company commander sa Charlie Company sa 78th IB, maoy mipahigayon sa imbestigayon.

Gitataw ni Lucas nga dili sila mo-tolerate sa ingon nga mga binuhatan sa mga opisyal sa armadong kusog.