PGMA, Noli moanhi sa Cebu

Dili lang si presidente Gloria Macapagal Arroyo maoy moanhi sa siyudad sa Sugbu karong semanaha kun dili lakip na usab si  Bise  Presidente Noli de Castro.

Ang presidente gitakda nga moabot sa dakbayan karong Biyernes, samtang ang bise presidente gipaabot usab karong adlaw nga  Sabado.

Pipila sa katuyoan ni  Arroyo mao ang pagpakigtagbo sa mga opisyal sa probinsya ug ang personal nga pagtunol sa award sa mga sakop sa Lupon sa dakbayan.

Kini human usab modaug sa bag-o lang natapos nga Galing Pook Award national level nga gipasiugdahan sa Department of Interior and Local Government (DILG).

Sa pikas bahin si bise presidente de Castro mao usab ang pinasidunggang dinapit sa Cebu City Urban Poor Congress 2008 nga ipahigayon diha sa St. Theresa’s College.

Kini subay usab sa pagsaulog sa dakbayan sa Urban Development and Housing Act (UDHA) week nga motapos karong adlaw nga  Sabado.

Nasayran nga ang bise presidente mao usab ang chairman sa Housing Urban Development Council nga maoy nagpayong sa tanang shelter ug housing agency sa nasud.

Ang Department for the Welfare of the Urban Poor (DWUP) sa Cebu City Hall gipaabot nga mopadangat  og mga  isyu  ngadto sa bise presidente atol sa nahisgutang congress.

Partikular na niini ang mga luna sa siyudad nga giproklamar na sa presidente isip socialized housing sites, ang kontrobersyal nga 93-1 lot sa probinsya ug uban pa.

Matud ni Allan Mar Catulinan sa DWUP, ilang gipaabot nga matubag sa bise  presidente ang maong mga hisgutanan ilabi na sa paghatag og pinuy-anan sa mga naigo sa demolisyon.