Laing biktima sa tulis napusilan sa nagmotor

Usa ka kawani nga lalaki sa Philippine Export Processing Zone Authority (PEZA) sa dakbayan sa Lapulapu kinsa misukol sa duha ka tulisan nga nagsakay og motorsiklo ang napusilan nga maoy nakaingon sa grabe niining pagkaangol.

Ang pagpanulis nahitabo sa sitio Tabay sa barangay Tayud, lungsod sa Liloan alas 7 pasado sa miaging Sabado.

Ang biktima mao si Julito Judaya Lauron, 37ug nagpuyo sa maong dapit.

Si SPO4 Florencio Apuado, officer-in-charge sa kapolisan sa maong lungsod nga nahinabi sa Banat News miingon nga naglakaw pauli sa ilang panimalay ang biktima ug nag-text niadtong tungora.

Ang duha ka wala hiilhing mga lalaki nga nagsakay og motorsiklo ang kalit lang mibabag sa agianan sa biktima ug nanaug ang nag-angkas nga nagtion og armas dungan ang pagdeklarar og  tulis.

Dihang gibunlot sa suspek ang cellphone nagdumili sa pagtugyan niini ang biktima og midagan apan gipusil kini sa tulisan sa buko-buko.

Human niini gipunit sa tulisan ang cellphone ug nibalik sa motorsiklo, ang biktima nadala dayon sa tambalanan sa Vicente Sotto Memorial Medical Center.