Naabiriya ang usa ka barko nga Super Shuttle Ferry-7 kagahapon sa kaadlawon didto sa kadagatan sa Anda Bohol.
Ang maong barko migikan sa Camiguin alas 8 sa gabii niadtong Domingo ug gitakda unta kining moabot sa pantalan dinhi sa Sugbo alas 8 sa buntag kagahapon.
Gibutyag sa staff sa Super Shuttle nga si Arcel Logarta nadaot ang timon sa maong barko hinungdan nga nag-utaw utaw na lang kini sa kadagatan sa Anda Bohol kagahapon sa alas 4 sa kaadlawon ug alas 10 pasado na sa buntag naayo og balik ug hinay-hinay nga nakalarga paingon sa pantalan sa Sugbu.
Gidugang ni Logarta nga dunay nagsunod nga back up ang Super Shuttle-5 sa naabiriya nga barko nga luwas nga nakaabot sa pantalan sa Sugbo alas 4 na sa hapon.
Matud ni Logarta tungod sa maong pagkaabiriya nalangay og 11 ngadto sa 12 oras ang biyahe niini gikan sa alas 8 kagahapon sa buntag nga maoy orihinal nga schedule sa arrival time niini.
Samtang gibutyag sa HRD manager nga si Dahyan Polo ang maong barko dunay 200 ka pasahero ug 26 ka mga tripulante apil na ang kapitan niini nga si Romeo Berdos.