Gipatay samtang nakig-inom

Gipusil patay ang usa ka batan-ong lalaki sa wala pa matumbok nga mamumuno samtang nag-inom inom kini kauban ang iyang mga higala didto sa barangay Busay, lungsod sa Moalboal Cebu sa alas 7:30 sa gabii niadtong Huwebes Santo.

Ang biktima giila sa kapolisan nga si Renante Requinto, 26, molupyo sa nahisgutang lugar ug usa ka estambay.

Matud ni PO1 Vicente Paañar sa Moalboal Police Station sa dihang nahinabi sa Banat News subay sa blotter nga iyang gibasehan nag-inom ang biktima kauban ang mga barkada niini sa usa ka tindahan sa maong lugar  sa dihang  miabot ang wala mailhing mamumuno gikan sa luyo nga bahin sa biktima.

Sa walay daghang estorya gidul-itan niini pagpusil sa tangkugo ang biktima sa wala pa matino nga kalibre sa armas nga milapos sa iyang tuo nga dunggan.

Deretso og katumba ang biktima diha sa ilang giinoman samtang yano ra kaayo nga  misibat pahilayo ang mamumuno nag-iyahay sa pagpanagan ang mga kauban sa inom sa biktima nga nakalitan sa maong   panghitabo.

Gisuwayan unta sa pagdala sa Badian District Hospital ang biktima apan gideklarar kini sa mga doktor nga dead on arrival (DOA).

Subay sa gihimong imbestigasyon sa hepe sa kapolisan sa maong lungsod  Insp. Rolly Lauron duna na silay lead kabahin sa mamumuno apan nagdumili kini paghatag og dugang detalye pagseguro nga dili mabulabog  ug aron dili makaeskapo.