Kapolisan ug mga sakop sa Philippine Drug Enforcement Agency (PDEA) K-9 ang gibati og kasagmuyo sa gibuhat ni Konsehal Ramse Sayson sa lungsod sa Minglanilla kinsa giingong nakainom ug miabli sa dakong pultahan sa sports complex diin gipahigayon ang Sugat-Kabanhawan Festival 2008 kagahapon sa kaadlawon dihang nagpahigayon og pagpangapkap ang mga polis ug PDEA K-9 sa mga mosulod sa lugar paglikay sa mga insidente ug sa paghigpit sa siguridad.
Ang mga sakop sa kapolisan ug PDEA ang mireklamo pinangulohan ni Intelligence Officer 3 Joselito Ermac uban sa mga sakop sa Cebu Provincial Police Office bomb squad kinsa mianha sa lugar niadto pang Sabado sa gabii lakip na ang kapolisan sa lungsod pinangulohan s si Police Senior Inspector Romeo Santander ang nagkatap sa lugar diin ipahigayon ang nahisgutang kalihokan diin ilang gipahigayon ang higpit nga siguridad.
Gisugdan kini og usa ka Santos nga Misa ug samtang nagpadayon ang misa pasado mga alas 3:00 kagahapon sa kaadlawon ang mga sakop sa kapolisan ug PDEA ang nangapkap ug mihiling sa mga bag sa nga tawong naglinya diha sa pultahan.
Apan gikatahong kalit lang mibutho si Sayson ug giablihan ang dakong gate hinungdan nga nabalewala na hinoon ang kahago sa mga awtoridad tungod kay naglumba na og sulod ang mga tawo.
Si Ermac ang mireklamo kang Sayson kay basin og adunay di maayong mahitabo ug sila unya ang basolon.
Si Sayson sa pakighinabi niini sa Banat News kagahapon sa kaadlawon mihimakak nga nakainom siya og ilimnong makahubog apan giangkon sa maong konsehal nga iyang gipasulod ang mga tawo tungod sa sugyot sa iyang consultant nga si Jimmy Caomeran kanhi konsehal sa lungsod ug tsirman sa kahapsay ug kalinaw.
Matud sa konsehal nga kuyaw nga mag-stampede ang mga tawo sa gawas tungod sa gitas-on sa linya nga gikan sa eskina paingon sa sports complex ug alang niya peligroso kini.
Si Sayson mibutyag nga ang sakop sa PDEA K-9 nagkanayon ngadto kaniya nga manghunaw na lang kung adunay negatibong hitabo ug iyaha usab kining gitubag nga mag-ampo na lang nga walay dautang mahitabo.
Itandi sa milabay'ng tuig mas-hapsay ang "sugat" kumparar karon kay mas daghan man ang misaksi.
Si Santander mibana-bana nga mokabat sa 25,000 ang gidaghanon sa mga tawo nga misaksi kagahapon apan gihulagway gihapon niyang malampuson gyud kini.
Kagahapon duha ka tawo ang nabiktima sa pagpanguot nga sila si Alan Defensor photo journalist sa Sun Star kinsa mikuha og hulagway sa pasundayag ang nakuotan sa iyang pitaka ug Rogelio Cavite, 32, taga sitio Kabutoy, barangay Pook, dakbayan sa Talisay ang nakuotan usab sa pitaka diin sulod niini ang P200 nga salapi ug iyang ID sa SSS ug Philhealth.
Sa laing bahin, usa sa gibitay nga batang anghel ug maoy mitangtang sa belo sa rebolto ni Birhen Maria ang nakuyapan.Ang coordinator sa kalihokan Victor Cuenco mibutyag sa mga tigbalita nga gibati og kahadlok ang bata tungod kay daghan ang mihugop nga mga tawo ug ang mga mibitad sa iyang pisi ang gipangtukmod tungod kay buot ilogon ang belo.
Matud ni Cuenco nga ang maong belo sagrado ug mao kini gigamit sukad pa kaniadto sa matag pahigayon sa Sugat sulod na sa sobra sa 100 na ka tuig.
Dunay mga tusong buot mogunting niini tungod kay giingong swerte kini sa pagpanagat lakip na ang mga sinina nga gisul-ob sa mga Santos apil sa guntingan usab ug ang mga buwak nga gibutang sa karo ang panghulboton sa mga matuho-tuhoon.
Si Cuenco mibutyag nga ang mga gihimo nilang anghel sa milabay'ng tuig 50 lang kabuok apan karon sobra sa 100 lakip na niini ang mga dance troupe sa University of Cebu ug kasagaran sa mga gipangkuha nilang mga bata nga anghel mga lumad nga taga Minglanilla.