Rambol sud videokehan usa patay, 1 angol

Usa ang patay ug duha ang naangol sa karambola sa duha ka grupo sa mga batan-on nga niresulta sa pagpamusil diha sa usa ka videokehan sa barangay Singsing lungsod sa Balamban niadtong Miyerkules sa alas 10:00 sa gabii.

Ang namatay giila nga si Apolinar Sirad, molupyo sa nahisgutang lugar,samtang nakaangkon og samad pinusilan sa lawas ang iyang manghod nga si Emiliano Sirad ug nalandig sa tambalanan.

Samtang nakaangkon sab og dinunggaban sa buko buko ang usa ka Nicomedes Cabuntagon, taga barangay Biasong sakop sa maong lungsod atol sa maong hitabo.

Subay sa gihimong imbestigasyon sa kapulisan sa Balamban ang grupo nila ni Sirad nag-inom sa maong videokehan nahimutang duol nga bahin sa barangay hall ug nag-inom usab ang laing grupo sa mga batan-on nila ni Nicomedes sa atbang nga bahin sa barangay hall nga sila si Jesus Pacaña, Tony Padayugdug ug Richard Dorado.

Matud ni PO1 Celso Makidato sa Balamban Police Station dihang nahinabi sa Banat News sa tanto nilang panag-inom nisangpot kini ngadto sa pagbinayloay og hait nga estorya nga niresulta sa ilang panag-away.

Nahitabo ang karambola sa grupo nila ni Sirad ug Nicomedes apan dunay usa ka kauban ni Nicomedes ang nipusil sa grupo nila ni Sirad ug naigo sa dughan si Apolinar ingon man ang igsoon niining si Emiliano.

Ang duha gidali pagdala sa Balamban district hospital apan paglabay sa pipila ka gutlo gideklarar nga patay sa mga doktor si Apolinar.

Ang kapulisan padayun pa sa ilang imbestigasyun pagsuta kun si kinsa sa mga kauban ni Nicomedes ang responsable sa pagpamusil sa magsuong Sirad.