Amahan, anak giluba

Nalandig sa Cebu City Medical Center (CCMC) ang amahan ug anak human mabiktima sa pagpanunggab niadtong Biyernes Santo diha sa Sitio Caduloy, barangay Tisa ning dakbayan.

Ang amahan ug anak giila sa kapulisan nga sila si Alfie Presbitero, 23, nakaangkon og duha ka samad sa iyang buko-buko, usa usab ka samad dinunggaban sa buko-buko ang naangkon sa iyang amahan nga si Calixto Presbitero, 57.

Samtang ang mga suspetsado giila sa kapulisan mao ang laing pamilya nga sila si Noli Luna, 33, nagpuyo sa nahisgutang lugar, Ramil Luna, 36, Sam Vicente Luna, 25, Diosdado Luna, 54 anyos.

Ang amahan ug anak nga sila si Diosdado ug Sam Vicente ang gitanggong na karon sa Punta Princesa Police Station human kini masikop ni SPO1 Jeffrey Diola human sa krimen.

Sa report sa Cebu City Homicide Section ang mga biktima diha sa tugkaran sa ilang panimalay dihang ang suspetsadong si Noli kalit nga nibutho ug gikalalis sa biktima.

Dihang nagkainit na ang ilang panaglalis kalit lang kining nibunot sa dalang “Batangas Knife” ug nagtinabangay ang mga suspetsado sa pagdunggab ngadto sa mga biktima.