Nagmotor namusil og tulo

Tulo ka mga tawo, duha niini pulos menor de edad ang naangol sa pagpamusil niadtong kaadlawon sa Biyernes Santo diha sa Don Pedro Cui ug R.R. Landon Streets, barangay San Antonio ning dakbayan.

Ang mga biktima giila sa kapulisan nga sila si Raymond Mangubat, 23, usa ka tinun-an ug residente sa Gorordo Avenue barangay Lahug, naangin usab ang duha ka menor de edad nga 13 anyos ug higala niining 12 anyos nga parehong nagpuyo sa barangay Cogon-Ramos.

Samtang ang gikatahong mga suspetsado duha ka wala mailhi nga nagsakay og pula nga motorsiklo nga walay plate number.

Sa imbestigasyon nila ni SPO4 Alex Dacua ug mga kaubanan sa Homicide Section ang biktima nga si Mangubat miasoy nga diha siya daplin sa dalan niadtong higayuna nga nakig-inom uban sa iyang mga higala.

Matud pa nga ang duha ka mga suspetsado nagsakay sa maong motor kalit lang nihunong ug ang angkas niini maoy namusil kaniya makadaghang higayon apan swerte lang kay makausa lang siya maigo sa iyang tuong tiil.

Ang batang diha ra sa duol naglingkod naangin usab. Hinungdan nga ang usa ka menor de edad nakaangkon og samad pinusilan sa liog samtang ang usa nakaangkon og samad sa iyang walang tudlo.

Human sa maong hitabo ang mga biktima gidali sa pagdala sa tambalanan samtang ang duha ka mga suspetsado dali kaayong nakasibat palayo sa lugar agi sa Jones Avenue.