Mamuhatay og sapatos gipusil

Gisaka sa pinuy-anan sa nagmaskara nga suspek ang usa ka mamuhatay og sapatos ug gipusil samtang naghigdahigda kini sa iyang kwarto paingon nga matulog niadtong Lunes sa alas 7:55 sa gabii didto sa Sityo Albor, barangay Liboron siyudad sa Carcar.

Ang biktima giila sa kapolisan nga si Christopher Parame, 41, molupyo sa maong dapit ug usa ka mamuhatay og sapatos samtang ang suspek wala pa mailhi sa kapolisan sa paghimo ning balita tungod kay nagtaptap kini sa iyang nawong.

Matud ni SPO1 Zacarias Cabaluna sa Carcar City Police Station dihang nahinabi sa Banat News naghigdahigda ang biktima human sa panihapon paingon nga matulog dihang kalit lang misaka ang suspek nga wala mamatikdi.

Ang biktima nakaangkon og samad pinusilan sa iyang wala nga abaga ug dughan daling gidala sa asawa ug mga anak  sa Carcar District Hospital apan tungod sa kaseryoso sa iyang mga samad nga na-angkon girekomendar kini nga ibalhin sa Vicente Sotto Memorial Medical Center.

Samtang ang nagtaptap nga suspek daling misibat.