Nalandig sa tambalanan ang usa ka giingong sugarol human kini mapusili sa usa ka Field Training Progam (FTP) police human giingong mipuntirya sa iyang pusil ngadto sa kauban nga FTP kagahapon sa kaadlawon sa barangay Tabunok, dakbayan sa Talisay.
Ang napusilan mao si Roger Prajes, 39, taga barangay Lagtang sa maong dakbayan kinsa nakaangkon og samad pinusilan sa wala niyang paa, daling gidala sa Talisay District Hospital apan gibalhin kini sa Vicente Sotto Memorial Medical Center niining dakbayan.
Si Parajes nasakmitan og usa ka kalibre .22 nga magnum revolver nga adunay upat ka mga buhing bala.
Base sa taho nga si PO1 Mauro Gramatica ug PO1 Rafael Albero parehong nadestino isip mga beat patrol diha sa Barangay Tabunok ug mipahigayon kini og roving sa lugar.
Base sa blotter sa kapolisan nga naaktuhan sa maong mga polis si Prajes uban sa laing mga nagsugal nga nagduwa og “tong-its” apan ang maong grupo sa mga sugarol naglumba og panagan dihang nagpaingon na sila si Gramatica ug Albero ug nahitabo ang ginukdanay.
Gikataho nga si Prajes natanggong diha duol sa usa ka supermarket sa Tabunok ug nagpasalipod kini dayon hulbot sa iyang armas ug giingong gitumong niini ngadto kang PO1 Albero.
Si PO1 Gramatica kinsa nakakita sa gibuhat ni Prajes daling mipusil sa paa sa suspetsado.