Gikan mitan-aw sa Pacquiao ug Marquez fight naaksidente, tipi

Namatay ang usa ka lalaki    gikan mitan-aw sa pay- per-view sa away tali nila ni Manny Pacquiao ug Juan Manuel Marquez niadtong Domingo sa hapon.

Nahitabo kini sa barangay Baclayan lungsod sa Boljoon  human ang biktima nga si Felix Alipin,53, usa ka construction worker ug molupyo sa nahisgutang lugar  nabanggaan  samtang sakay sa iyang motorsiklo sa gikasugat nga laing  motor nga gimaneho sa usa ka Roldan Corpuz, sa Emcor Marketing.

Si Corpuz ingon man ang duha niini ka mga backrider nga sila si Richard Bellones, 22, taga Simala, Sibonga ug usa ka Lenie Marie Lirasan, 20,  pulos mga collector sa maong kompaniya.

Sila si Corpuz, Bellones ug Lirasan  nakaangkon og mga pangos ug bun-og sa kalawasan ug sa paghimo ning balita naa pa sa tambalanan.

Gibutyag ni SPO4 Cristino Oraca  sa Banat News  gikan pa mitan-aw og away tali ni Pacquiao ug Marquez ang biktima sa libreng pasundayag sa telebisyon sa Boljoon gymnasium.

Apan paghiabot niini sa maong lugar nikalit og liko ang biktima aron motabok sa atbang sa karsada diin nahimutang ang ilang pinuy-anan apan wala mabantayi niini ang laing motorsiklo nga kusog ang pagpadagan paingon sa lungsod sa Oslob.

Gisuwayan unta pagdala sa tambalanan ang biktima apan gideklarar kini sa mga doktor nga Dead On Arrival (DOA) paghiabot sa Don Vicente Sotto Memorial Medical Center (DVSMMC).”