3-anyos tipi sa Red tide

Namatay ang usa ka 3 anyos nga batang lalaki human mahilo sa gikaon niining “suwaki”  sa barangay Canhabagat lungsod sa Medellen niadtong Lunes.

Gitug-an ni Dr. Roilan Momongan, Rural Health Officer sa Medellen ang namatay nga si Warren Mercader, molupyo sa maong lugar.

Gibutyag ni Dr. Momongan  nga ang tres anyos nga bata dead on arrival kini paghiabot sa Bogo Medellen Medical Center ug nasuta nga food poisoning ang hinungdan sa kamatayon niini subay usab sa gihimo niining mga pagsukit sukit gikan sa ginikanan sa bata nga nitug-an nga nakakaon og daghang suwaki ang biktima sa wala pa ang maong hitabo.

Gumikan niini daling  gimando sa tinugyanan sa Department of Agriculture (DA)  ang pagkuha   og mga sample sa mga sea urchins kon tuyom ug uban pang mga kinhason sa dagat sa maong lugar nga gipasusi sa Bureau of Fisheries and Aquatic Resources (BFAR-7).

Kini maoy hinungdan nga niluwat og advisory ang BFAR-7 niadtong nilabay’ng Huwebes petsa 13 ning bulana nga nagkumpirmar nga apektado sa red tide ang tibuok kadagatan sa maong lungsod.

Matod ni   Momongan subay sa maong  advisory temporaryong gidid-an ang mga molupyo pagpanguha og pagkaon sa “tuyom”  ingon man sa uban pang mga kinhason sa kadagatan sa tibuok lungsod.

Gitug-an ni Dr. Momongan nga mismo si Mayor Recardo Ramirez niluwat na kini og mga pahimangno ngadto sa mga molupyo nga nagdili lang una pagkaon sa mga kinhason sa kadagatan sa ilang lugar hangtud nga malibkas na ang maong advisory.

Hinuon gidugang ni Dr. Momongan nga gikan niadtong niaging semana hangtud kagahapon wala na sila’y nadawat nga report nga duna pay laing tawo nga nabiktima sa pagkahilo tungod sa pagkaon og kinhason sa kadagatan sa ilang lungsod apan wala silay hunong sa pagmonitor niini.