Sakyanan, gamit mao gyuy problema sa polis

Hugot nga gisuportahan ni Konsehal Efren Herrera ang tinguha ni Mayor Arturo Radaza nga paghatag og dugang sakyanan ug kahimanan sa kapolisan.

Si Herrera nga bugtong oposisyon nga konsehal sa maong dakbayan nga nahinabi sa Banat News miingon nga mahingpit lamang sa mga polis kun ang lokal nga kagamhanan sa dapit nga ilang nadistenohan  suportahan sa mga  opisyal.

Matud pa ni Herrera nga ang mga pagpanulis  nga mahitabo bisan sa udtong tutok   makapaalarma na sa mga magpapatigayon ug publiko.

Matud pa niini nga ang sulbad lang niini mao ang pagsuporta sa lokal nga kagamhanan pinaagi sa pagpalit og sakyanan ug kahimanan alang sa mga polis.

Kahinumdoman nga ning bag-ohay lang gitulis sa mga armadong lalaki ang mga kawani sa Cebuana Lhuillier diha sa tiilan sa Marcelo Fernan Bridge, wala madakpi ang mga tulisan.