Nasikop niadtong Miyerkules sa hapon sa mga sakop sa Provincial Anti-Illegal Drugs Special Operation Task Group ang usa ka babaye kinsa giingong pusher og ginadiling drugas diha sa sitio Hawod Compound, barangay Bulacao, dakbayan sa Talisay.
Ang suspetsado giila sa mga polis nga si Janet Cabriana,41-anyos, residente sa lugar kinsa nagtingkagol karon sa Talisay detention cell.
Dala nila ni SPO4 Ernesto Navales, SPO1 Isaias Cabuenas ug PO3 Benjamin Sabellita ang warrant of arrest (docketed) batok kang Cabriana ang giluwatan ni Regional Trial Court Judge Fortunato de Gracia sa Branch 15 sa kalapasan sa Section 11 sa Akta Republika 9165 kon “Comprehensive Dangerous Drug Act Law”.
Ang nahisgutang mga sakop sa PAIDSO-TG ang nakadawat og taho kabahin sa nahimutangan ni Cabriana hinungdan sa pagkasikop niini.
Sa laing bahin si Police Inspector Rolando, polis sa Talisay mibutyag kagahapon sa Banat News nga aduna usab siyay duha ka warrant of arrest batok kang Cabriana nga giluwatan usab ni de Gracia sa mao lang gihapon nga kalapasan.
Ug gawas sa maong warrant ang ilang warrant server nga si SPO2 Jerome Abatayo ang adunay gihuptan nga laing warrant nga kalapasan sa section 5 sa RA 9165 batok kang Cabriana.
Gikataho usab nga si Cabriana ang padayon gihapon sa iyang ilegal nga kalihokan.