Sugat-Kabanhawan sa Mingla nindoton

Gipasalig ni Bise Mayor Lani Penia nga mas nindot ang ilang ipahigayong  Sugat  Kabanhawan Festival karong tuiga kun  itandi sa miaging tuig.

Matud pa sa bise mayor atol sa 888  news forum diha sa Waterfront hotel nga ang lungsod sa Minglanilla mogahin og 
P2.5 milyones   alang sa pagpahigayon sa ilang Sugat Kabanhawan festival karong Marso   23.

Samtang gipahibalo ni Eric Pagar, usa sa mga organizers sa maong event walo ka mga contingents nga mosalmot sa ipahigayon nilang street dancing atol sa maong festival ug usa ka platoon sa Regional Mobile Group (RMG) ang ipadala atol sa maong kasaulogan.

Matud pa ni Jimy Cumeran, consultant sa  peace and  order sa nahisgutang lungsod nga gawas sa RMG, dunay mga sakop sa Bomb Squad ug mga  K-9 unit ang ipakatap sa lugar diin himuon ang nahisgutang festival.

Hinuon nagtuo si Cumeran nga malinawon gihapon ang ilang pagpahigayon sa Sugat Kabanhawan, kini pareho sa sitwasyon sa milabay'ng panahon diin ilang gihimo ang nahisgutang kalihukan.

Si Sr. Insp. Romeo Santander, hepe sa kapolisan mitug-an nga karong Lunes moabot ang augmentation  force sa RMG hangtod na sa maong kalihukan.

Lakip sa ipakatap ni Santander ang mga sakop sa Barangay Intelligence Network (BIN) nga maoy moabag sa kapolisan pagpahamtang sa kahapsay ug kalinaw tungod kay napanglantawan niini nga mas modaghan ang mga tawo nga mosaksi sa maong kalihukan.