Crips mitahan sa Talibon

Boluntaryong mitahan sa kapolisan sa Talibon Bohol ang usa ka sakop sa  Crips Gang ug gi-turnover usab kagahapon sa udto diha sa Cebu City Police Office human kini mitug-an nga nag-atubang kini og kasong murder dinhi sa dakbayan sa Sugbu human namusil sa laing sakop sa Bloods Gang sa  miaging tuig.

Ang gi-turnover diha sa CCPO giila nga si Albert Navarro, 21, taga dalan Duterte  Sitio Kanaas, Banawa barangay Guadalupe, samtang ang nihatud niini sila si SPO4 Restituto Auza hepe sa Intelligence sa Talibon Police Station uban ni PO3 Cresanto Bonghanoy Jr.

Si Navarro gipresentar kagahapon sa udto atubangan mismo ni CCPO Chief Patrocinio Comendador diha sa iyang buhatan.

Ang biktima miluwat sa extra-judicial confession nga siya maoy mipusil sa giila lang sa pangalan nga si Seneto sakop sa Bloods nga iyang gipusil niadtong  Marso 10 sa miaging tuig diha sa  Mango Square human siya mibalos niini sa dihang gidunggab usab siya niini.

Miangkon  kini  nga gawas sa kasong murder nakatulis usab siya sa miaging Pebrero sa usa ka internet  café diha sa Banawa apan sa panahon nga makaigo siya mosibat ngadto sa Bohol.

Tulo na usab siya ka tuig nga nasakop sa nahisgutang gang apan gipadayag niini nga dili niya kaila kadtong mga sakop nila sa gang nga nakapatay sa  nursing nga si Ruby Jade Ruba.