Pilderong kandidato pagka-konsehal nga mipasaka og kasong ‘bigamy’ batok kang Daanbantayan Vice Mayor Maria Luisa Judal Loot ug banang si Police Senior Supt. Vicente Loot ang gipusil kagahapon sa buntag diha sulod sa iyang tindahan sa duha ka wala mailhing mga lalaking nagsakay og motorsiklo sa barangay Bateria sa Daanbantayan.
Giila sa kapolisan ang gipatay mao si Engineer Renerio “Gogong” Arrogante III kinsa nakaangkon og daghang samad pinusilan sa iyang lawas nga nakaingon sa hinanali niining kamatayon.
Base sa report sa kapolisan, si Arrogante diha sulod sa gipanag-iyang tindahan nga Mainroad square ug nag-estorya sa iyang asawa ug anak nga lalaki dihang kalit miabot ang mga gikatahapan ug mipusil kaniya makadaghang higayon. Ang mga gikatahapan gikatahong nagsuot pareho og mga helmet .
Si Daanbantayan Mayor Sun Shimura mimando dayon kang Police Chief Inspector Jovito Canlapan sa paghimo og lawom nga imbestigasyon sa motibo ug sa pag-ila sa mga mamumuno, apan si Sr. Supt. Loot gustong ang National Bureau of Investigation-7 maoy mohimo niini aron mapapas ang pagdudang dunay “whitewash” nga mahitabo sa kaso.
Gikatahong diha si Sr. Supt. Loot, kinsa mao karon ang hepe sa Regional Human Resource Development Division sa Police Regional Office-7 sa maong lungsod pagkahitabo tungod sa ika-80 anyos nga adlaw'ng natawhan sa iyang inahan.
“Na-shock gyud mi nga gipusil siya. I’m sure nga ma issue na-pud ni but limpyo among conscience about the incident and I don’t think so politics is the reason of his death,” sumala pa sa 25 anyos nga mayor nga si Shimura sa pakighinabi sa The Freeman.
Si Shimura miangkon nga dako ang iyang pagtuong sila karon ang gidudahan sa mga kakontra nila sa politika nga may kalambigitan sila sa kamatayon ni Arrogante.
Si Arrogante mipasaka og kasong ‘bigamy’ batok sa magtiayong Loot una pa ang eleksyon niadtong bulan sa Mayo apan kini gibasura sa Cebu Provincial Prosecutor’s Office tungod sa kakulang og merito.
Si Arrogante mipasangil kang kanhi mayor Maria Luisa Loot nga kasado pa kang Rolando Nicandro dihang nagpakasal kini kang Sr. Supt. Vicente Loot. Matud pa niini si Maria Luisa ug Nicandro nakasal niadtong Mayo 23, 1980 sa sala ni Judge Marcelino Escalona.
Samtang gipasanginlan usab ni Arrogante Sr. Supt. Loot nga kasado sa usa ka anak og heneral dihang iyang gipakaslan si Maria Luisa.
Nasuta nga naprubahan ni Maria Luisa nga dihang sila gikasal ni Nicandro kasado usab diay ang naulahi sa laing babaye maong walay bili ang ilang kasal sumala pa sa hukom, samtang si Loot nakaprubar usab nga annulled ang kasal niini sa anak sa heneral dihang iyang giminyoan si Maria Luisa.
Nanawagan karon ang kabanay ug kaila ni Arrogante nga susihon ang tanang anggulo sa kamatayon niini.(Uban ni Garry Lao sa The Freeman)