Duha ka barangay sa dakbayan sa Talisay nga naapektahan sa sunog ang gipaubos sa state of calamity, kagamhanan sa siyudad migahin og P1.5 nga salapi alang sa relief operation ug rehabilitation sa mga nasunogan.
Si Felipa Solan, hepe sa social welfare sa dakbayan mibutyag kagahapon sa Banat News nga ang siyudad mipaubos sa barangay Tabunok ug San Isidro nga under state of calamity aron makapagawas og pundo sa calamity fund ang dakbayan.
Matud ni Solana nga naa pa sila karon sa phase sa relief operation apan posibleng sabotan pa kung asa dapita motukod og balik sa ilang mga balay ang mga biktima tungod kay ang yuta nga kanhi gibarogan sa ilang mga balay usa ka pribado.
Sa laing bahin, si Solana nagkanayon nga naimbestigar na nila ang inahan sa 2-anyos nga bata kinsa gigaid sa iyang inahan diha sulod sa ilang gipuy-an ug sa maong hitabo ang bata nakaangkon kini og 2nd degree burn sa iyang walang bukton ug paa ug usa ka tiguwang nilang silingan ang mikurso og sulod sa balay nga nagdilaab ug miluwas sa maong bata.
Si Solana nagkanayon nga ang inahan sa bata ang mibutyag ngadto kaniya nga duha palang sila ka buwan nga mipuyo sa lugar ipon sa iyang igsoon diin kanhi didto sila magpuyo sa lungsod sa Balamban.
Apan ang bana niini nakabuhat og krimen didto sa lugar ug nagtingkagol kini sa prisohan mao nga ang maong inahan miahat usa ug ipon sa iyang igsoon dala ang tulo niya ka anak nga nagpanuigon og singko-anyos, duha ka tuig ug masuso.
Ang nahisgutang inahan ang miangkon kang Solana nga hapit na maligsi ang nahisgutang bata nga napaso tungod kay dihang naninda siya og kahoy milakaw kini ngadto sa karsada mao nga kada paninda niya og kahoy nga ilang panginabuhian igaid na lang niya kini.
Matag paninda niya og kahoy ang dalhon niya ang iyang kamagwangan aron makatabang ug ang iyang masuso.
Sa laing bahin usab, si Talisay City Fire marshal Felipe Canillas mitataw nga ang nahisgutang sunog maoy ikaduhang hitabo sa tuig 2008 ug sa pagsaulog sa Fire Prevention Month niining buwana.