Bata naigo sa bala

Usa ka batang lalaki nga namunit og basiyo sa bala sa armas sulod sa Cebu Pistol and Rifle Association firing range sa Lipata, Pusok, dakbayan sa Lapulapu ang naigo sa mibanda nga bala ug milapus sa tiil niini.

Ang biktima mao si Romeo Tagapulgo Abendan, 14 anyos ug nagpuyo sa maong dapit.

Si SPO1 William Humoc sa homicide section nga nahinabi sa Banat News miingon nga naglisod sila sa pag-ila kun kinsang armas ang nakaigo sa tiil sa biktima sanglit wala man nila makaplagi ang slug niini.

Matud pa niya nga maoy ilang pagtuo nga diha lang sa duol ang biktima atol nga gipahigayon ang target shooting ug ang bala nga mibanda miigo sa tiil sa biktima.

Dali nga gidala sa Mactan Doctor's Community Hospital ang biktima kinsa padayon pa nga giatiman sa mga doktor sa maong tambalanan. (Romeo T. Limpangog)