Mopahigayon og lawom nga imbestigasyon ang Talisay City Social Welfare kabahin sa taho nga ilang nadawat nga ang usa sa mga naangol sa sunog niadtong Miyerkules sa hapon diha sa sitio Kasambagan, Tabunok, Talisay nga 2-anyos nga bata ang gigaid og nylon diha sulod sa ilang balay maong wala kini makagawas dayon ug nakaangkon og 2nd degree burn sa iyang walang bukton ug paa.
Ang hepe sa social welfare sa dakbayan, Felipa Solana nagkanayon kagahapon sa Banat News nga mopahigayon sila og lawom nga imbestigasyon sa maong taho aron ila kining makompirma.
Base sa taho nga ang maong bata gihigtan og nylon ang tiil niini ug nag-sige kini og singgit dihang miulbo na ang kalayo sa sunog, swerte kay usa ka tiguwang nga ilang silingan ang mikurso og sulod sa balay ug gitigbas ang higot nga nylon ug daling gidala ang bata palayo sa nagdilaab na nga balay.
Base usab sa taho nga adunay mga ginikanan diha sa lugar nga nasunogan ang mogaid gyud sa ilang mga anak nga gagmay diha sulod sa ilang balay aron dili kini makalakaw samtang ang mga ginikanan magbantay sa ilang mga baligya nga maoy ilang panginabuhian apan uban kanila ang giingong magsugal.
Ang ubang mga nabiktima sa sunog kinsa nahinabi sa Banat News kagahapon sa buntag mibutyag nga ang kalayo naggikan sa balay sa ginganlan og “Menis” apan wala silay kasayoran sa hinungdan sa sunog.
Gawas sa maong bata, laing unom ang nangaangol nga sila si Norma Osabel, 45, Ronelito Deiparine, 27, Maria Theresa Hernane, 10, Marvin Rago, 18, Luciano Denila, 32, ug ang kapitan sa barangay nga si Maning Cabriana, 48.
Base sa talaan sa city social welfare mikabat sa 188 ka pamilya diin 152 ang habig sa Tabunok ug 36 ang habig sa Barangay San Isidro ang nabiktima sa sunog.