Pagbisitang Lozada ok sa Sugbu – Dakay

Pabor ang simbahang katoliko sa Sugbo nga mohinayun og bisita dinhi sa Sugbo si  ZTE star witness Rodolfo “Jun” Lozada Jr. aron ipadayon ang campus tour sa mga lain laing tunghaan aron pagpahibalo ang iyang nahibaw-an sa nabulgar nga NBN Broadband  deal scandal.

Matod ni Monsenyor Achilles Dakay, tigpamaba sa Archdiocese sa Sugbu, dili angay did-an si Lozada nga makayagyag atubangan sa mga Sugboanon sa nahibaw-an niini sa maong eskandalo sa gobyerno.

Gibutyag ni Dakay dihang nahinabi sa Banat News nga angayan gyud nga moanhi sa Sugbo si Lozada tungod kay   daghan sad  ang  mga whistle- blower dinhi sa Sugbo batok sa mga anomaliyang transaksiyon sa gobiyerno.

Gitumbok ni Dakay ang mga whistleblower sa Sugbo sa overpricing sa lamppost nga gipalit niadtong nilabay'ng Asean Summit, overprice nga pagpamalit og mga computer sa siyudad sa Lapulapu, nabulgar nga car smuggling sa Sugbo, ang gikataho nga overpricing sa pagpatukod sa Cebu International Convention Center (CICC) ug ang nabulgar nga  mega  shabu Laboratory.

Matod ni Dakay nga kun siya maoy pabut-on angay hatagan og higayun nga magkadungan si Lozada ug ang mga whistleblower sa Sugbo pagpahigayun og campus tour sa mga lainlaing tunghaan dinhi sa Sugbo may labot sa mga anomaliya ug kontrobersya nga ilang nahibaw-an sa mga opisyal sa gobyerno.

Nasayran nga una nang nipadayag og pagsupak sila si Gobernador Gwendolyn  Garcia, Toledo City mayor Arlene Zambo  ug besi mayor Michael Rama sa dakbayan sa Sugbo sa tinguha ni Lozada nga moanhi sa Sugbo aron ipadayun ang iyang campus tour nga nasugdan didto sa mga tunghaan sa kaulohan. (Darrel A. Carumba)