Nihangyo og re-investigation ang hepe sa Provincial Intelligence Branch (PIB) Supt. Juanito Enguerra kabahin sa resulta sa pre-charge investigation nga gihimo sa Regional Investigation and Detective Management Division (RIDMD) sa nahitabong pag-eskapo sa walo ka mga piniriso nga nagpahamtang kanila sa kasong Simple Neglect of Duty.
Gawas pa niini, ipahigayon usab karung pipila ka adlaw ang summary hearing ug patubagon sila si Enguerra, iyang mga sakop ug laing sakop sa Regional Intelligence Division (RID).
Matud ni Enguerra nga wala gyud siya mauyon sa desisyon nga gipakanaog ni Sr. Supt. Arturo Evangelista nga mag-atubang sila og simple neglect of duty ingon man nirekomendar sa summary hearing ngadto kang PRO-7 Chief Supt. Ronald Roderos.
Subay niini, giawhag ni Enguerra nga wala lang unay himuong summary hearing diha sa PRO-7 samtang pending pa ang iyang request for re-investigation.
“First time nakasohan ko ingon ana, mangita pata og abogado, na-demoralized ko ana, kinsa ang naay sala maoy nay kasohan, kinahanglan ma-trace kinsa gyuy sad-an sa pag-iskapo sa walo ka mga piniriso,” dugang pang Enguerra.
Niingon si Enguerra ang detention cell sa Provincial Headquarters dili sa PIB kundili iya sa CPPO apan diha lang nahimutang sa kiliran sa ilang buhatan.
Apan ang imbestigador sa RIDMD mibutyag niadtong Biyernes sa mga tigbalita nga duna gyuy tulobagon si Enguerra tungod sa command responsibility ug napakyas usab kini sa pag-supervised sa iyang mga tawo isip maoy labaw sa PIB.