Agent sa NBI Nanion

Usa ka confidential agent nga driver sa kanhi direktor sa National Bureau of Investigation-7 ang gidakop sa mga barangay tanod ug mirespondeng sakop sa Mobile Patrol Group human kini pasanginling nagmaoy ug nanion og pusil sa ka-boardmate niini sa sitio Gerabsan sa barangay Basak-San Nicolas kagahapon sa kaadlawon.

Ang suspek nga armado og kalibre 45 pistola nga Norinco ug may usa ka magazine nga may sulod nga walo ka buhing bala giilang si Romulo Almendras, 44, nagpuyo sa maong dapit.

Samtang ang mireklamo giilang si Roldan Amber Delan, 25, usa ka trabahante sa usa ka electrical supply store ning dakbayan ug kaubang nag-abang sa usa ka boarding house sa suspek diha sa maong dapit.

Matud pang Supt. Andres Bayarcal, hepe sa Mambaling police station nakadawat sila og report kagahapon sa kaadlawon kabahin sa usa ka tawong armado og pistolang nanghasi diha sa maong dapit ug girespondehan sa mga barangay tanod ug mga sakop sa MPG.

Ang suspek nadakpan nila ni PO1 Jojit Ramile ug PO1 Victor Blankas sa MPG car 001 inabagan ni barangay konsehal Lanievie Fajardo ug mga tanod ug gidala sa Mambaling police station.

Nasuta nga gawas sa pagtion og armas positibo usab sa ilimnong makahubog si Almendras human kini ipailawom sa liquor test sa Cebu City Medical Center.

Hinuon gitug-an ni Bayarcal nga nakapakita og dokumento sa armas si Almendras ug sa paghupot niini, apan gumikan kay dunay reklamante ug nipasangil nga nanion si Almendras, arestado gyud kini tungod sa grave threat ug nadugang nalang ang paglapas niini sa city ordinance 1929 kun Drunkenness.

Si Almendras dihang gihinabi sa mga tigbalita miangkong nakainom niadtong tungura ang  mihimakak nga nanion siya og tawo ilabi na kang Delan.

Matud pang Almendras nga “langas” ug banha kaayo si Delan niadtong tungura maong iya kini gibadlong ug iya usab gipatiran ang bungbong sa iyang lawak nga nag-ulang sa lawak ni Delan.

Dugang pa niini nga dili tinuod nga iyang gitiunan og armas si Delan kundili iya ra kini gitulisok sa iyang tudlo sanglit ang iyang armas naa ra gyud sa iyang hawak.

Nasuta gikan kang Almendras nga siya maoy driver ni kanhi NBI-7 director Reynaldo Esmeralda apan human nga mibalhin na kini sa kaulohan nanginabuhi nalang siya isip VIP driver dinhi.