Nanawagan si Cebu City Councilor Arsenio Pacaña ngadto sa kabarangayan sa dakbayan nga mopatuman usab sa mga probisyon sa National Building Code.
Lakip nga giawhag sa konsehal nga mohimo og “coordinative effort” alang sa nahisgutang lakang, mao ang mga lokal ug nasudnong ahensya sa kagamhanan.
Tinguha sa konsehal nga mapatuman sa hingpit ang mga balaud ug ordinansa nga magluwas sa mga kinabuhi ug propriyedad gikan sa sunog ug ubang kalamidad.
Kini samtang giobserbar sa tibuok kapupud-an ang buwan sa Marso isip Fire Prevention Month nga nagdala sa tema nga “Prevent Fire, Be Informed, Get Involved”.
Sa dakbayan sa Sugbu, ang Cebu City Fire Department nakadawat og 28 ka alarma sa sunog sa buwan sa Marso sa niaging tuig.
Kini gibana-banang nidanyos og kapin sa P5.1 milyones, ug nikalas sa pito ka kinabuhi nga natanggong sa kalayo ug nalakip pagkaugdaw sa ilang pinuy-anan.
Gawas sa kanunay’ng pagmatngon ug pagmabinantayon, giawhag usab ni Pacaña ang hingtungdang mga buhatan ug ahensya paghawan sa kadalanan.
Kini aron kun dili man kapugngan ang nahisgutang kalamidad, dili na maglisod ang kabomberuhan pagtubag sa bisan unsang alarma sa sunog.