Samad sa wala nga bukton ang naangkon sa usa ka dalaga nga biktima sa pagpanulis kagahapon sa kaadlawon diha sa Golden Ville Subdivision Banawa, Barangay Guadalupe ning dakbayan.
Si SPO1 Antonio Barete sa Guadalupe Police Station 9 nga gikahinabi sa Banat News miila sa biktima nga si Arlene Bisagas, 26 anyos ug residenti usab sa maong dapit.
Samtang ang gikatahapang suspetsado nga wala pa mailhi gibana-banang nagpangidaron kini og 20 pataas, 5”2 ang gitas-on, black complexion, nagsul-od ug kawo atol sa pagpanulis.
Si SPO1 Barete nagkanayon nga ang biktima nakaangkon og samad sa wala nga bukton human kini pusila sa suspetsado dihang nilugnot pagbira sa suspek sa iyang bag nga adunay sulod nga 4 mil pesos ug usa ka cell phone.
Ang biktima naglakaw kini mga alas 12:15 sa kaadlawon kagahapon padulong na unta sa iyang gipuy-an sa nahisgutang dapit dihang giatangan sa suspek.
Gitug-an ni SPO1 Barete, nga adunay usa ka batan-on nga bag-ong laya sa nahisgutang dapit ang ila karong gipangita human usab adunay mga report nga posibleng kini maoy namiktima sa maong dapit.