Pagdili pagbutang sa ngalan sa politiko sa ilang proyekto suportahan

Suportado ni Konsehal Arsenio Pacaña ang balaodnon nga mag-ban ug magsilot sa mga politiko nga magbutang og pangalan niini sa gipasiugdahang proyekto.

Ang konsehal nga maoy chairman sa Committee on Historical Affairs and Streetnaming sa City Council miingon nga angayan lang nga mahingpit nang balaod ang maong proposal.

Kini tungod kay alang kang Pacaña, dili kuwarta sa politiko ang gigasto sa proyekto niini kun dili pundo gikan sa gobyerno nga naggikan usab sa buhis sa katawhan.

“Dili man na kwarta sa politiko, part man na sa iyang trabaho, dili gyud maayong nganlan, aron ang iyang pagtrabaho kinasingkasing ba it’s not for personal reason,” sumala sa konsehal.

Sagad sa mga proyekto nga gipasiugdahan sa mga politiko, dunay pahibawo nga kini nagagikan sa iyang paningkamot.

Usa sa mga rason sa mga politiko niini, aron dili makalimtan ilabi na sa iyang mga konstituwente panahon sa eleksyon.

Makita ang mga pangalan sa mga politiko nga gipamutang diha sa mga tulay, karsada, skywalk ug sa ubang mga inprastraktura.

Apan matud ni Pacaña, dili angayang mahadlok ang mga politiko tungod kay kini giingong dili makalimtan sa katawhan kung dunay maayong binuhatan sa katilingban.

Alang kang Pacaña, mas maayo sa usa ka politiko nga ang buhat maoy pasultihon ug dili ang sulti maoy pabuhaton.