Patay na nga napalgan sa mga paryente ang usa ka 56 anyos nga lalaki diha sa Palm Beach Resort sa barangay Marigondon dakbayan sa Lapulapu kagahapon sa udto.
Ang biktima mao si Cepriano Hortizano, 56, biyudo ug residente sa Sitio Sta. Maria Barangay Pusok dakbayan sa Lapulapu.
Base sa imbestigasyon ni SPO1 William Homoc ug PO3 Manolito Abellanosa sa homicide section nagsaulog ang kabanay sa biktima sa usa ka birthday sa ilang paryente.
Si Hortizano midali og kaligo sa dagat gumikan kay taob niadtong higayona apan nahibulong ang tanan nga wala pa makakawas sa dagat ang biktima hinungdan nga ila kining gisusi ug mao nalang ang ilang nakita nga naglutaw na si Hortizano nga wala na kini maginhawa.
Gidali kini og dala sa Mactan Doctors hospital apan gideklarar kini nga dead on arrival kon DOA gumikan kay kini nalumos.