Mga bata did-an sa internet cafés

Dakbayan sa Talisay ang mopahigayon og higpit nga kalihokan paghunong sa mga menor de edad nga mosulod sa mga internet café ug moukab sa mga pornographic websites.

Ang kagamhanan sa dakbayan aduna nay daghang mga reklamo nga nadawat kabahin sa maong problema.

Si Talisay City Administrator Richel Bacaltos nagkanayon nga tungod sa ka barato sa renta sa matag oras ug accessibility sa mga internet café ug walay balaod nga higpit nga nagdili sa mga bata nga mag-abli og mga law-ay nga websites hinungdan nga mikatap ang maong problema.

Kahinumduman nga si Bacaltos dihang konsehal pa kini sa dakbayan ang miduso og ordinansa nga idili sa mga internet café pagpasulod og mga menor de edad oras sa klase.

Ang maong ordinansa giluwatan human sa mga taho nga daghang mga estudyante ang mag-cutting classes ug mo-absent sa klase kinsa ang maong mga estudyante ang gikatahong anha lang mag-estambay sa mga internet café magduwa og mga online games ug mag-surf sa mga website.

Si konsehal Shirley Belleza, tsirman sa komitiba sa Kababayen-an, Kabataan ug Pamilya ang miduso og resolusyon nga nagdili sa mga menor de edad nga  mopundo mga alas 10 sa gabii diha sa mga internet café.

Ang maong resolusyon naluwat human nga mikatap ang taho nga adunay mga menor nga babaye ang nagbaligya sa ilang dungog ug ang mga rugby boys ang mikatap usab.

Ang maong resolusyon ni Belleza ang usahon sa ordinansa ni Bacaltos ug sa curfew law sa siyudad.

Si Bacaltos ang miawhag kang Belleza nga mogama og balaodnon nga magpamulta sa mga internet café nga magtugot sa mga bata og ukab sa mga pornographic website.