Kalihukan sa fire month han-ay
Ubay-ubay nga mga kalihukan gihan-ay sa Cebu City Fire Department subay sa pag-obserbar sa Fire Prevention Month sugod karong adlawa.
Ang pag-obserbar sa Fire Prevention Month karong buwana, nagdala sa tema nga “Prevent Fire, Be Informed, Get Involved”.
Ang kabomberuhan sa rehiyon misugod sa ilang kalihukan pinaagi sa usa ka fun run kagahapon sa alas 4 sa kaadlawon gikan sa Fuente Osmeña ngadto sa ilang rehiyonal nga buhatan.
Matud sa Chief of Staff sa Cebu City Fire Department, Major Rodelio Damaolao, nga lakip sa ilang mga kalihukan mao ang pagpahigayon og fire safety seminar sa kabarangayan.
Kini gawas sa ilang subsob nga fire safety inspection sa tanang mga balay patigayon ug sa nagkadaiyang mga establisamento sa siyudad.
Miingon si Damaolao nga angayan lang i-obserbar sa mga Sugbuanon ang Fire Prevention Month tungod kay sa buwan sa Marso mahitabo ang daghang mga sunog.
Gani sa buwan sa Marso niadtong miaging tuig, ang kabomberuhan sa dakbayan nakatubag og 28 ka alarma sa sunog. (Elly Bolonos)
- Latest
- Trending
