'Killers' sa decorator sikop

Duha sa tulo ka lalaking maoy gidudahang suspek sa pagpatay sa interior decorator nga si Alexander Deen kinsa gibinaklid og gaid sulod sa kasilyas sa giabangan niining balay diha sa third floor sa Mercedez Arcade sa Franco Building diha sa barangay Tipolo dakbayan sa  Mandaue niadtong Pebrero 22 nasikop.

Ang nangadakpan giilang sila si Albert Angga alyas Titat, 24,  ug Wilbert Obaniel alyas Wilwil, 19, parehong taga sitio Sta. Cruz sa barangay Lorega-San Miguel dakbayan sa Sugbu samtang gipangita pa ang ikatulong suspek nga giila lang sa pangalan nga “Bolagdo Otto.”

Ang duha nadakpan diha sa sitio Crossing barangay Balud sa lungsod sa San Fernando sa mga miyembro sa Mandaue City Police Office Intelligence and Detective Management Bureau.

Sumala pang MCPO director, Sr. Supt. Rodel Calungsod kinsa maoy nirepresentar sa duha ngadto sa media gitumbok sa duha nga si Otto maoy utok ug mao gyuy nipatay sa biktima.

Nangangkon ang duha nga gipik-ap sila niadtong Pebrero 19 ni Deen diha sa Lorega aron patabangon sa paghakot og buwak bugti sa suhol nga P200 matag usa kanila.

Sanglit daan naman silang nakatrabaho uban ni Deen misugot silang duha ug naghakot sila og buwak diha sa balay niini. Matud pa nila nga si Deen nisulti kanila nga papangitaon og kaubang “molingaw” kaniya samtang ang duha nagtrabaho sa silong.

Tuod man gitawgan sa duha si Otto kinsa miabot dayon. Si Otto gikatahong usa ka macho dancer. Apan dihang diha na ang duha sa lawak nadunggan nila si Deen nga nagpunay og singgit ug nangita sa iyang cellphone.

Gani silang duha gipangitaan usab maong gihukas nila ang ilang mga sinina aron ipakitang wala gyud kini kanila, apan kalit lang mibutho si Otto ug may gikuptang pusil sa kamot ug gimandoan sila niining gunitan si Deen.

Matud pa gidala nila si Deen sa kasilyas ug gigunitan samtang gigapos ni Otto ang mga bukton niini sa luyo ug dihang nisinggit og pakitabang ang biktima giapil og baat ang baba niini og panapton.

Human niini migawas si Otto apan namatikdan sa duha nga daw giatake sa sakit sa kasing-kasing si Deen apan wala silay gihimo aron kini tabangon tungod sa kahadlok kang Otto.

Sumala pa nila samtang nagtinga si Deen nakapangayo sila og pasaylo kaniya una pa nila kini biyai sa hingpit. Kasong robbery with homicide maoy ipasaka sa MCPO batok sa tulo sumala pang Calungsod.

Samtang ang piskalya nay mag-igo kung himuong state witnesses ang duha batok kang Otto. Si Otto gikatahong tua na sa Manila human sa insidente.