Patay nang nakit-an ang usa ka mananagat sa baybayon sa Sitio Segra barangay Buwanoy Balamban niadtong Lunes sa alas 7:00 sa buntag.
Giila sa kapulisan ang biktima mao si Eliezer Juliane, 53 anyos, minyo, molupyo ra usab sa nahisgutang lugar ug pagpanagat ang pangita niini.
Matud ni PO2 Cesar Climaco sa Balamban Police Station dihang nahinabi sa Banat News ang asawa sa biktima nga si Elvisa maoy nipahibalo sa ilang buhatan kabahin sa iyang bana nga nakit-an sa ilang mga silingan nga wala nay kinabuhi ug nagbuy-od na sa lapyahan sa baybayon.
Ang biktima niadto pang Domingo sa hapon nigikan dala ang pukot aron managat.
Apan natingala nalang ang asawa niini tungod kay wala gyud kini mopauli nianang pagka-gabii ug pagkasayo sa buntag gisubay niya kini sa dagat ug didto iyaha nalang nakit-an nga gitapukan na kini sa mga tawo diha sa baybayon ug wala nay kinabuhi.
Matod ni PO2 Climaco dunay mga samad sa tuong kilay ug ubos sa baba ang biktima dihang gihiling ang patay'ng lawas niini sa mga imbistigador. (Darrel A. Carumba)