Suspendido na ang labaw sa Land Appraisal Division sa City Assessor’s Office diha sa Cebu City Hall nga si Engracio Lumangtad.
Ang suspension order gihatod mismo sa pinuy-anan ni Lumangtad tungod kay kini wala na motunga sa iyang buhatan sa City hall kagahapong adlawa.
Mga 60 ka adlaw o duha ka buwan ang gipahamtang nga preventive suspension kang Lumangtad nga gipirmahan ni Mayor Tomas Osmeña samtang kini ipaubos og imbestigasyon.
Si Lumangtad nasikop sa gipahigayong entrapment operation sa National Bureau of Investigation (NBI-7) niadtong miaging semana.
Kini human ireklamo nga nangilkil og P50 mil sa usa ka Francisco Bontuyan diha sa barangay Talamban bugti sa pag-release sa tax declaration sa yuta niini.
Matud sa labaw sa Human Resource Development Office sa City Hall nga si Atty. Ralph Sevilla, nga siya maoy gimanduan sa mayor paghimo sa suspension order.
Si Sevilla nga sakop usab sa Employee-Management Committee On Investigation (EMCOI) sa City Hall niingon nga ila gilayong sugdan ang pag-imbistigar kang Lumangtad.
Kini sa higayon nga maduso na sa NBI-7 ang mga dokumento nga ilang gikinahanglan, lakip na ang affidavit sa mga nagsikop sa suspetsado.
“After the NBI would turn-over all the records to us, then we will start the administrative investigation against Lumangtad,” sumala ni Sevilla.
Nasayran nga si Lumangtad gipasakaan usab sa NBI-7 og mga kaso ngadto sa Ombudsman Visayas human masikop sa entrapment.
Kini sama sa robbery/extortion, conduct unbecoming of a public official, ug kalapasan sa anti graft and corrupt practices act. (Elly Bolonos)