Nilikay sa iro, nadasmaga’g bus

Naligsan na hinuon ang usa ka 10-anyos nga batang tinun-an sa grade four dihang nidagan aron paglikay nga dili mapaakan og irong nigukod niya apan aksidente hinuong naligsan sa minibus sa kalsada sa barangay Tangil lungsod sa Dumanjug niadtong adlaw’ng Huwebes.

Ang biktima mao si Armando Mission, tinun-an sa Tangil Elementary School samtang gitumbok nga drayber nga nakaligis kaniya mao si Domingo Balang, 44, taga Poblacion Samboan.

Matud ni PO1 Cristopher Barro sa Dumanjug Police Station dihang nahinabi sa Banat News ang biktima nidagan palayo sa iro nga nigukod niini apan sa pagtabok niini sa highway duol sa pantalan sa Tangil nadasmagan kini sa naghaguros nga minibus.

Sigun sa mga nakasaksi naningkamot unta ang drayber paglihay sa pikas linya apan naabtan gyud kini ug nalatayan sa ligid ang walang bitiis sa biktima ug pagkapangos sa ubang bahin sa kalawasan niini.

Ang biktima daling gidala sa Barili District Hospital ug luwas na hinoon sa peligro apan gika-report nga operahanan ang nabali nga tiil niini samtang ang drayber boluntaryong nitahan sa kapulisan.

Apan nasayran gikan ni PO1 Barro nga nakagawas si Balang niadtong miaging hapon human magkasabot sa amahan sa bata nga si Samuel Mission nga abagahon ang tanang gastuhan sa tambalanan bugti sa dili na pagpasaka og kaso.