79 nasakit og Dengue sa Mandaue

Mokabat na sa 79 ka tawo ang nataptan og sakit nga Dengue ug duha na kanila ang namatay sukad sa Enero hangtod sa tungatungang bahin sa bulan sa Pebrero karong tuiga diha sa Mandaue.

Kini ang nasayran sa Banat News kang Oscar Quirante, health officer sa maong dakbayan nga nahinabi niadtong miaging adlaw.

Gitataw niya nga pipila kanila kabilin pa sa bulan sa Disyembre sa miaging tuig apan dako ang iyang pagsalig nga mokubos pa kini karong bulan sa Marso niining tuiga.

Matud pa ni Quirante nga padayon ang ilang hugot nga kampanya nga pagpakgang sa pagkuyanap sa mga lamok nga magdala og sakit nga dengue pinaagi sa pagbungkag sa mga itloganan, pagpanglimpiyo sa mga kanal ug palibot sa kabalayan nga ilang gituohang gipuy-an sa daghang mga lamok.Si Quirante miingon nga nag-una sa dunay mga kaso sa Dengue ang barangay   Banilad, Maguikay, Mantuyong, Guizo ug Tipolo samtang ang uban gipanid-an pa.

Si Banilad barangay Kapitan Glenn Bercede nga nahinabi sa Banat News gawas sa ilang pagpanglimpiyo migahin sad sila og dakong kantidad aron mapadayon ang kampanya batok sa Dengue pinaagi sa paghimo og mga kanal.