Duha ka balikbayan nga nurse misukol sa duha ka tulisan nga mitulis kanila kagahapon sa kaadlawon sa Barangay Dumlog, dakbayan sa Talisay.
Ang mga biktima giila sa mga polis nga si Marissa Magalso ug Estrellita Tecson, parehong hingkod ang panuigon, lumad nga taga Piñan, Zamboanga del Norte.
Si Tecson mibutyag sa Banat News kagahapon nga bag-ohay lang silang miabot gikan sa Kuwait diin sa maong nasud sila nagtrabaho isip mga nurse.
Ang duha mianha sa nahisgutang lugar tungod kay mibisita sila ug mibakasyon sa usa nila ka higala.
Si Tecson ug Magalso nag-atang og masakyan diha sa daplin sa karsada sa dihang duha ka wala mailhing lalaki nga nagsakay og motorsiklo kalit lang mitungha ug ang usa niini ang nanaog ug miingon nga ‘hold-up”.
Gilabni sa maong lalaki ang bag ni Magalso apan gigukod sa biktima ang maong tulisan ug nagbinunlutay sila sa bag ug gihapak sa tulisan sa dala niining pusil ang maong biktima.
Si Tecson dali usab nga miayuda kang Magalso ug gibunalan sa iyang dalang back pack ang tulisan ug nabawi ang bag ni Magalso apan ang bag ni Tecson nasawo sa tulisan sa paghapak niini ug nahitabo ang ginukdanay ug inilogay apan gihapak ang agtang ni Tecson sa tulisan sa dala niining pusil hinungdan nga nadala gyud ang back pack niini nga nagkantidad og P500 nga dunay sulod nga duha ka libro, usa ka cell card nga duna pay sulod nga P300 nga load, Nokia cellphone, P1,200, duha ka ticket, P2,240 ug salapi nga nagkantidad og P240.
Si Tecson nakaangkon og gisi sa tuo niyang kilay samtang si Magalso nakaangkon og bun-og sa tuong bukton.
Ang nahisgutang mga biktima daling mitaho sa kapolisan human sa maong hitabo samtang ang mga tulisan daling miikyas ug hangtud karon wala pa kini mailhi.