Labing minos lima na ang namatay sa mga tinun-an sa publikong mga tunghaan sa dakbayan sa Sugbu tungod sa dengue.
Kini maoy gibutyag ni Cebu City Schools Division Superintendent Lorna Rances, subay sa padayong pagsaka sa mga kaso sa dengue dinhi sa siyudad.
Nagtuo hinuon si Rances nga wala sa mga tunghaan ang tinubdan sa dengue tungod usab sa ilang hinugtanay nga kampanya batok sa makamatay nga sakit.
“Mura man og dili kay ang mga maestra duna man na silay dengue brigade, musuroy man gyud na sila palibot sa tunghaan kung naa bay standing water,” sumala ni Rances.
Taliwala niini, gimanduan na usab sa City Schools Division Superintendent ang mga magtutudlo nga dili na mubutang sa ilang lamesa og presko nga buwak.
“Atong gi-suggest diha nga mga plastic na lang nga mga buwak ang ilang gamiton aron dili na kinahanglang butangan og tubig ang mga flower vase,” nagkanayon si Rances.
Kanunay na usab nga gipasuroy sa City Schools Division Superintendent ang mga health ug nutrition personnel alang sa information dissemination batok sa dengue.
Kini subay usab sa memorandum circular nga giluwatan sa uluhang buhatan sa DepEd agig pagsuporta sa kampanya sa DOH batok sa nahisgutang makamatay nga sakit.
Base sa DepEd memorandum number 72, ang mga schools officials gimanduan nga maoy mangulo pagmintinar sa kalimpyo sa mga tunghaan.
Kini aron masiguro nga luwas ang mga tinun-an gikan sa dengue nga nikalas na og ubay-ubay nga mga kinabuhi dinhi sa dakbayan.
Apan giklaro hinuon ni Rances nga makawang lang ang ila unyang mga paningkamot kung dili usab magpakabana ang mga tawo sa komunidad.
“Mas maayo nga ang tanan aktibo gyud nga manglimpyo dili kay ang mga tunghaan ra aron magmalampuson ang kampanya batok sa dengue,” nagkanayon si Rances.
Ang Department of Health (DOH) una nang mirekomendar sa upat ka S nga paagi pagpakigbatok sa nahisgutang sakit.
Kini mao ang “search and destroy” kon pagpangita ug pagyabo sa posibling kaitlugan sa mga lamok, “seek early treatment” sama sa pagpakunsulta dayon kun hilantan, Self protection kun magsul-ob og mga tag-as nga sinina ug pantalon ingon man sa paggamit og moskitiro ug mga repellants, ug “say no to indiscriminate fogging”.